أليس فى بلاد العجائب

Admin عدد المساهمات : 1397 تاريخ التسجيل : 15/05/2011

[size=24][b][b][b]
أليس فى بلاد العجائب

كان يا مكان
زمااااااااان
كان فى بنت صغنتوتة عندها حوالى اتناشر سنة
اسمها أليس
وأليس كانت بنت ذكية ومطيعة ومجتهدة
وبتروح كل يوم المدرسة وبتسمع كلام المدرسين
ولما ترجع البيت تتغدى وتستريح شوية وتبدأ تذاكر
وكان من عادة اليس انها كل يوم العصر تنزل الجنينة بتاعة بيتها تتمرجح شوية هى واختها وكانت أختها تحكى لها الحكايات اللطيفة وهما قاعدين مع بعض
وفى يوم وأليس قاعدة فى الجنينة كالعادة حست بالملل فقامت تتمشى شوية وتقطف أزهار الفل تعمل بيها عقد
وفجأة شافت أرنب أبيض لابس بدلة شيك جدا
ومعدى قدامها وبيبص فى ساعته وبيقول يااااااه دا أنا اتأخرت اوى..
استغربت أليس جدا لانها عمرها ما شافت أرنب لابس بدلة ومعاه ساعة وبيتكلم فرمت أزهار الفل اللى كانت فى ايدها وجريت وراه حتى لما دخل جحره دخلت وراه
وكان جحر الأرنب ممر طويل فضلت أليس ماشية فيه لكن فجأة وقعت فى حفرة واسعة
وفضلت أليس فى الحفرة عمالة تفكر حتعمل اييييييية؟؟؟
فضلت أليس تفكر لكنها غلبها النوم فنااااااامت
وفجأة انتبهت على صوت الأرنب وهو بيعدى من قدامها ومستعجل جدا وبيكلم نفسه وطبعا اليس مشيت وراه ولقت نفسها فى مكان واااااااسع مليان جدران وأبواب كتيرة وفى الوسط ترابيزة
حاولت أليس تفتح اى باب من الأبواب لكنها كلها كانت مقفولة
وقفت تفكر لكنها شافت مفتاح ذهبى على الترابيزة
أخدته وراحت عند باب ارتفاعه حوالى نص متر بس
وجربت المفتاح لقته فتح ففرحت اوى
لكنه كان بيطل على ممر ضيق جدا حتى قطتها متقدرش تعدى منه بصت كدة لقت فى نهاية الممر دة حديقة جميلة واتمنت انها توصلها لكن مكانتش تقدر تدخل راسها حتى من الباب
فضلت تفكر وبعدين فجأة استغربت وقالت مين اللى جاب الزجاجة دى هنا؟؟؟!!!
كانتش وجودة على الترابيزة من الأول
ولقت مكتوب عليها بخط كبير "اشربينى" فتحت أليس الزجاجة وداقت اللى فيها لقته طعمه حلو وهى كانت عطشانة فشربت الزجاجة كلها
وشوية وصرخت أليس
كان فى حاجة غريبة بتحصلها
كانت بتصغر
لكنها فرحت أوى لأنها حتقدر تمر من الباب وتوصل للحديقة الجميلة
وجريت على الباب لكنها افتكرت انها قفلته والمفتاح فوق الترابيزة وهى بقت صغيرة اوى ومش قادرة توصل للمفتاح
فحزنت اوى وكانت حتعيط لولا أنها شافت علبة صغيرة تحت الترابيزة فيها بسكوتة مكتوب عليها (كُلينى) فأكلت البسكوتة
لقت نفسها بتكبر بتكبر لدرجة ان راسها اتخبطت فى السقف
وزعلت اليس وفضلت تعيط وتعيط لدرجة ان دموعها عملت بركة صغيرة
وهى بتعيط سمعت صوت فمسحت دموعها علشان تقدر تشوف مين لقته الأرنب الأبيض وكان مستعجل كالعادة وكان معاه مروحة بيهوى بيها من الحر لكن لما شاف اليس خاف منها وطلع يجرى ورمى المروحة على الأرض
اخدتها أليس وجريت وراه علشان ترجعهاله لكنه كان اختفى
مسكت أليس المروحة وحركتها لان الجو كان حر وفجأة لقت نفسها بتصغر
كل ما تهوى بالمروحة تصغر فضلت تصغر وتصغر لما بقت مناسبة لحجم الباب لكنها وقعت فى بركة الدموع بتاعتها
وفضلت تعوم وهى بتقول يا ريتى ما عيطت العياط دة كله
سمعت أليس صوت بيعوم معاها بصت كدة لقته فار صغير فسألته انت تعرف الطريق للخارج؟؟
لكنه مردش عليها
فقالت اه يا قطتى لو كنتى هنا كان زمانك ساعدتينى
اول ما الفار سمع كلمة قطة خاف واترعب
حست أليس انها غلطت فقالت له خلاص أنا اسفة نسيت انك مش بتحب القطط أرجوك ارجع انا محتاجة مساعدتك
اتأثر الفار بكلامها ورجع وقالها تعالى للشط الأول وبعدين احكى لك انا مش بحب القطط ليه
فضلت أليس تعوم بسرعة علشان توصل للشط والفار يحكى لها الحكاية لكنها سمعت أصوات كتير مختلفة ولقت على يمينها بطة وعلى شمالها بغبغان وهناك نسر صغير وديك رومى كلهم بيعوموا وراها لحد ما خرجوا كلهم
وطلبوا من الفار يحكى لهم الحكاية
قال لها الفار وهو حزين دى قصة طويلة وبدأ يحكى
لكن أليس افتكرت قطتها وهو بيحكى ومامتها وبباها والبيت فمسمعتش حاجة خالص من كلامه
فبص لها وهو غضبان وقالها انتِ مش منتبهة لكلامى وسابها ومشى قبل حتى ما تعتذر له
والطيور اللى كانت موجودة كمان مشيت ولقت نفسها وحيدة
وفجأة تغير كل شئ
الدموع اختفت والترابيزة كمان والأبواب الكتير
ولقت أليس نفسها فى غابة واسعة وأول حاجة فكرت فيها أنها لازم ترجع لحجمها الطبيعى
مشيت أليس فى الغابة شوية شافت قدامها نبتة من نبات عيش الغراب (المشروم) وقاعدة عليها دودة ضخمة
بصت الدودة لأليس وقالت لها انتِ مين وعايزة اية
أليس قالت لها أنا اسمى أليس وانا متضايقة اوى لان كل شوية حجمى يتغير ومش عارفة اعمل اية
الدودة قالت لها دة شئ عادى
عموما نبتة عيش الغراب دى الجزء اليمين منها يخليكى تكبر والجزء الشمال يخليكى تصغرى
وفجأة اختفت الدودة
فضلت أليس تاكل من كل جانب قطمة لحد ما رجعت لحجمها الطبيعى ففرحت جدا
وأخدت معاها من عيش الغراب السحرى
مشيت أليس فى الغابة ووصلت لبيت ارتفاعه حوالى متر ونص وبابه أقل من نص متر
فأكلت من عيش الغراب اللى بيصغر ووقفت قدام الباب تفكر حتعمل اية
شافت حارس جاى من وسط الغابة شكله زى السمكة تمام ولابس بدلة
خبط الحارس على الباب الصغير فخرج ليه الخادم شبه الضفدع تمام واخد من السمكة ورقة ملفوفة
هى عبارة عن دعوة من الملكة للعبة الكريكيت
بعد الحارس ما مشى راحت أليس للضفدع وطلبت منه يسمح لها بالدخول
وكانت سامعة جوة البيت أصوات صراخ وعطس مستمر وأطباق بتتكسر فدخلت ولقت نفسها داخل مطبخ مليان دخان
والأميرة قاعدة على كرسى بتلات رجلين ومعاها بيبي مش بيبطل عياط وكمان أربع خدم بيطبخوا ويعطسوا وكان فى قطة مبتسمة قاعدة عند رجلين الاميرة
سلمت أليس على الأميرة وقالت لها ممكن حضرتك تقوليلى هى قطتك مبتسمة كدة ليه؟
قالت الأميرة: أصلها قطة من قطط القمر
وقفت الأميرة وادت الطفل لأليس وقالت لها خدى لاعبية لحد ما اغير هدومى علشان أروح ألعب الكريكيت مع الملكة وخرجت بسرعة
شالت أليس البيبي وخرجت بيه فى الهوا وفجأة اتفزعت أليس لما لقت البيبى اتحول لكلب صغير وطلع يجرى من بين ايديها على الغابة
لقت أليس القطة المبتسمة واقفة قدامها وبتبتسم لها فسألتها أليس أى طريق امشى فيه؟؟ شاورت لها القطة بمخالبها وقالت لها فى الجهة اليمين دى عايش صانع القبعات (القبعة يعنى بُرنيطة او طاقية) وفى الجهة الشمال ساكن الأرنب والقطة قالت الكلمتين دول وهوووووب اختفت
مشيت أليس للناحية اللى ساكن فيها الأرنب وكانت فاكراه الأرنب الأبيض لكن بعد كام خطوة لقت أرنب تانى خالص لونة رمادى وقاعد مع صانع القبعات على ترابيزة تحت الشجرة قدام البيت وعلى الترابيزة براد الشاى وكام فنجان وطبق كيك وفار نايم على الترابيزة بين الارنب وصانع القبعات
وكانوا قاعدين ساكتين خالص فراحت اليس وسحبت كرسى وقعدت وهى منتظرة حد يقدم لها الشاى لكنهم فضلوا ساكتين وبع فترة طويلة قال صانع القبعات للارنب على فكرة الذبدة دى مش كويسة رد عليه الارنب وقال له دة احسن نوع عندى فقال صانع القبعات وهو متنرفز ازاى دة دى قربت تعفن مكانش لازم تحطها جنب العيش وقاموا يتخانقوا هما الاتنين فمشيت اليس وهى زعلانة منهم وبعد شوية وهى ماشية فى الغابة شافت شجرة ضخمة جدا فى جذعها باب دخلت منه لقت نفسها فى حديقة جميلة زى اللى كانت فى الممر الضيق ومدخلها مليان بالورد الأبيض ولقت تلاتة من البستانيين (البستانى هو من يعتنى بالحديقة ويرويها) كان البستانيين دول بيدهنوا الورد الأبيض باللون الأحمر فاستغربت واستغربت اكتر لما لقت البستانيين دول على شكل ورق كوتشينة شوية وظهرت الملكة فى وسط اسرتها وضيوفها
وشافت أليس الأرنب وهو لابس بدلة مليانة بالميداليات الدهبية والفضية
وشافت الملكة أليس وسألتها انتِ اسمك اية؟
فردت عليها أليس بأدب وقالت اسمى أليس يا مولاتى الملكة الملكة قالت لها تحبى تلعبى كريكيت؟ فردت أليس وقالت أيوة صرخت الملكة بصوت عالى جدا وقالت كل واحد يقف فى مكان
وكانت اغرب لعبة كريكيت شافتها اليس فى حياتها
الكرات كانت عبارة عن قنافد صاحية والمضارب بجعات بردو صاحية وطبعا اليس مش عارفة تتحكم فى البجعة لانها بتتحرك كل ما تيجى تضرب بيها الكرة اللى هى القنفد البجعة تحرك رقبتها الناحية التانية والملكة كان صوتها مزعج جدا وهى بتصرخ وبتقول تعليماتها للاعبين
سألت الملكة أليس: انتِ شوفتى السلحفة الحزينة؟؟ أليس قالت أنا معرفش حاجة عن السلحفة الحزينة ومسمعتش عنها قبل كدة
الملكة قالت طيب تعالى والسلحفة حتقولك على قصتها ومشيوا مع بعض فى الغابة وكان فى بغبغان نايم فى الشمس الملكة زعت وقالت له قوم يا كسلان روح مع البنت الصغيرة دى للسلحفة الحزينة علشان تحكى لها حكايتها وانا هرجع علشان اشوف اللى ورايا فى المملكة
راحت اليس والبغبغان للسلحفة الحزينة وكانت قاعدة فوق صخرة وكانت بتعيط قربت أليس وسألتها عن سبب حزنها اتنهدت السلحفة وقالت : لما كنت صغيرة كنت بروح المدرسة وكنت بتعلم القراءة والكتابة وكانت مدرسة الرسم سمكة عجوزة بتعلمنا الرسم والتلوين وفجأة حست أليس احساس غريب لقت نفسها بتطول بتطول وكانت راسها حتخبط فى الشجرة العالية مدت ايديها علشان تحمى راسها ووشها من الفروع لكنها لقت نفسها نايمة فى المرجيحة واختها بتشيل بعض اوراق الشجر اللى وقعت عليها وهى نايمة
اخت اليس قالت لها اصحى بقى يا أليس انتِ نمتى كتير اوى أليس قامت وهى مفزوعة وقالت ايه ده؟؟؟!!!
يعنى كل دة كان حلم؟؟؟؟
يااااااااه دة حلم غريب وعجيب أوى!!!
وحكت أليس لاختها الحلم فقالت أختها يااااه دة حلم عجيب فعلا بس يلا بينا بقى علشان نشرب الشاى وناكل الكيك اللى ماما حضرته
جريت أليس وهى بتفكر فى الحلم العجيب[/b][/b][/size]